Salvamos un libro?

Na biblioteca, nas aulas, nos corredores terás visto este cartaz ou outros similares.
Quizá xa saibas que numerosas bibliotecas escolares galegas iniciamos a campaña Salvando libros e contamos coa túa colaboración: se pertences ao alumnado,  ao profesorado, ao persoal da administración e servizos ou es nai ou pai do alumnado deste instituto, quédache feito o convite, mesmo o rogo, para salvares un libro da literatura galega.
E como se salva? A única maneira de que non desapareza é téndoo dentro de un propio, na memoria; por iso,

1. Memoriza un fragmento, por breve que sexa, do libro que salvarías e cópiao nun folio, como o da imaxe superior, que, se aínda non está contigo, podes recoller na biblio.
2. Preenche os outros datos pedidos nese folio (o teu nome e unha brevísima razón da  escolla dese libro).
3. Deposítao nunha caixa que, para ese fin, encontrarás na biblioteca. O venres, 29 ou o luns, 2 de maio son as datas indicadas, mais podería ampliarse á primeira semana de maio por enteiro.

A campaña ten ámbito galego e, proximamente, montaremos unha exposición coas vosas/nosas obras salvadas e coas salvadas nos demais centros onde, pola súa parte, coñecerán o que nós salvamos.
Agradecemos moito que difundas e participes.