quarta-feira, 14 de outubro de 2009

O idioma: identidade, presente e futuro



Baixo este título, o foro “ÁGORA ABERTA: ideas, iniciativas e propostas...a tempo” organiza un debate que terá lugar mañá, xoves, 15 de Outubro, ás 20 horas no Salón de Actos do noso instituto.

O foro “ÁGORA ABERTA: ideas, iniciativas e propostas...a tempo” é un colectivo, aínda en trámite de constitución, de cidadáns e cidadás de LUGO que, despois de reflexionarmos sobre os novos proxectos de futuro que se nos anunciaron a resultas das pasadas eleccións autonómicas, valoramos colectivamente imprescindible contarmos todas e todos cunha opinión, o máis informada posible, sobre cada un deses novos proxectos. Somos, pois, un colectivo de cidadáns e cidadás ilusionados en indagar, descubrir e coñecer cada un dos proxectos e propostas que están a conformar a nosa vida ou a nosa persoal forma de ser e de estar na sociedade.
E queremos, ademais, trasladar esta preocupación a toda a sociedade, a calquer cidadán ou cidadá, sen máis discriminación que a de saber compartir o debate con absoluto respecto polo outro/a.

O idioma é sempre e en calquer lugar unha construción colectiva. O seu futuro, pois, incúmbenos a todos e a todas. Con este debate queremos, precisamente, mostrar ante o conxunto da cidadanía e, dende distintas perspectivas, as consecuencias que para o futuro do idioma galego van a ter as propostas que sobre o idioma está a poñer en marcha o goberno saído das últimas eleccións autonómicas.


Participación confirmada:
Laura Sánchez Tizón: catedrática da USC e exconselleira de Educación (PSOE)
Paco Rodríguez: catedrático de Literatura e socio-lingüista (BNG)
Agustín Baamonde: parlamentario por Lugo (PP)
Pendentes de confirmación:
Representante do Consello da Cultura de Galicia

1 comentário:

Anónimo disse...

Debo dicir que non foi un acto solemne canto ao trato da lingua. Houbo ataques fundamentados noutros temas políticos que no contexto, estaban de máis.
As opinións foron moi diversas e non se alcanzou un consenso de tipo algún.
Ademais, o público en xeral, non recollía a diversidade social existente no noso país, polo que se pode ver un desinterese global por parte da poboación.
O certo é que o galego é parte da identidade do noso pobo, pero dun pobo que non acepta nin amosa interese pola súa propia identidade.

Xabier Valle

25N. CONCURSO DE POSTERS.

                                                    Con motivo da conmemoración do Día contra a violencia de xénero, a Biblioteca organiza u...